Á sombra das pereiras

Estes días estamos con altas temperaturas, pasando parte de Europa unha nova onda de calor. Poder contar con esta sombra das pereiras no xardín é unha marabilla! Os nosos hóspedes disfrútana e sen dúbida unha das cousas máis valoradas dos apartamentos é o xardín.

Abrótegas

As abrótegas (asfódelos en castelán) son esas plantas silvestres, moi abundantes en Galicia, que agora na primavera están esplendorosas e enchen os campos, montes, cunetas,... É unha planta cultivada en xardín noutras latitudes, e xunto a outros porros silvestres vendíase a mediados do século pasado en mercados de S.Sebastián para facer porrusalda ou outras receitas coas súas follas, despois de cocelas, porque crudas son tóxicas. Aquí, hai anos, as súas sementes empregábanas os rapaces coma munición dunha arma que fabricaban cunha póla de biouteiro. Planta moi importante polo tanto para a cativería. E hai moitos séculos, Homero contaba que as ánimas seguían a Hermes ao país dos soños ata chegar aos Campos Asfódelos que xunto cos Campos Elíseos e o Tártaro formaban o Hades.

Eu limiteime a coller unhas poucas abrótegas para facer un ramo.

Celindos en flor

No mes de maio os celindos, en plena floración, enchen co seu aroma os xardíns. En Seselle, e no resto da contorna, ao celindo ou filadelfo chamámolo erroneamente cinamomo. É un arbusto moi doado de cultivar que alegra na primavera hortas e xardíns.

Desexando que chegue a primavera! Poder pasar máis tempo no xardín.

Apetece?

Despois da comida, disfrutar dun rato de relax escoitando os paxaros, notar a lixeira brisa, observar o ceo sen nubes,... soñar. Apetece pasar tempo no xardín!

Disfrutar do xardín

Coa primavera en todo o seu esplendor, os momentos no xardín da casa apetecen moito máis. De día ou de noite, hai que aproveitar!

Ruta teatralizada das Letras Galegas

Encantada de colaborar na IV Ruta teatralizada das Letras Galegas da Agrupación Instrutiva de Caamouco e a A.VV. de Limodre. Todo un pracer recibilos na nosa casa!

Sobresaliente para a organización, as actuacións e o público.

Momentos na horta

Nestes primeiros días de abril a natureza vibra co seu rexurdir e os momentos na horta permítennos disfrutar deses brotes nas árbores e plantas, dos traballos e cantos dos paxaros, das caricias do sol, das carreiras das nubes no ceo cambiante, das chuvias lixeiras de primavera, do firmamento na noite,...

Tantos momentos!

A vella pía

Esta vella pía, onde se lles botaba a auga ás galiñas no galiñeiro da casa, na actualidade ten un uso ben diferente. Coas dúas bromeliáceas e a gasteria flanquea a porta de entrada, poñendo un toque natural coa pedra e as plantas no porche de entrada.

Frías e solleiras mañás de inverno

Comezamos xaneiro con tempo frío, pero solleiro e seco. A horta en inverno tamén convida a pasar tempo nela. A tradescantia está espectacular. Soporta o inverno estupendamente.

Días de agosto

Con ondas de calor abafando a península, nada coma o frescor das hortas de Galicia. Bos momentos na horta dos apartamentos!

A mesa de picnic

Para cantas cousas pode servir unha mesa de picnic nun recuncho do xardín? Para moitas cousas máis do que o seu nome indica. Por exemplo, para que os hóspedes afeccionados ao debuxo poidan pasar unhas horas facendo os seus bosquexos.

Disfrutando do xardín!