Praia O Raso

A praia de O Raso está na actualidade apenas separada por unhas pequenas rochas da praia de Seselle coa que forma un enorme areal perfecto para longos paseos. É unha praia tranquila de area dourada e con pequenas calas hacia o lado da illa do Mourón que con marea baixa podemos disfrutar.

Dar unha camiñata pola mañá cedo ou á tardiña, dende a casa de apartamentos ata a praia Seselle-O Raso é un xeito magnífico de comezar ou rematar o día.

A Praia Pequena de Chanteiro

A Praia Pequena de Chanteiro é unha cala diminuta, pero fermosísima que con marea baixa amplía considerablemente a súa extensión. Esta pequena xoia do concello de Ares é de visita obrigatoria pola súa beleza espectacular. Deixemos que falen as imaxes!

(A poucos minutos da casa en coche).

Premio Traveller Review Awards 2024 de Booking

Ao longo deste ano, esforzámonos por ofrecer aos hóspedes unha experiencia inesquecible por iso recibir este premio Traveller Review Awards 2024 de Booking énchenos de ledicia. Gracias Booking.com por recoñecer todo este traballo e esforzo e gracias, sobre todo, á nosa clientela que o fixo posible. Seguiremos traballando para manter a confianza e mellorar cada día un puquiño máis.

Empanada galega

Un dos pratos que reina na gastronomía galega é, sen dúbida , a empanada. Dende as máis tradicionais , gramadas ou non, de xoubas, bacallau con pasas, bonito, berberechos, zamburiñas, ... ata as máis innovadoras de xamón con mazá, lacón con dátiles, etc. O fundamental é unha masa sabrosa e un bo recheo. Estes son os ingredientes da masa que facemos na nosa casa: fariña, aceite de oliva sobrante da preparación do recheo, auga morna, viño branco, ovo e sal. A masa divídese en dúas metades e colocamos unha sobre a bandexa de forno.

Agora botamos o recheo,

neste caso primeiro a cebola pochada cos pementos

e por riba a carne de xamón picada, a mazá e as pasas moscatel.

Tapamos coa outra metade da masa, decoramos, pintamos con ovo e ao forno.

E aquí está o resultado.

Bo proveito!

Oferta de Semana Santa 2024

Apartamento A Cercada ou apartamento As Mirandas: 

Un dormitorio (cama matrimonio) + 2 prazas en sofá cama no salón.

     2 persoas - 60€ noite

     3 persoas - 75€ noite

     4 persoas - 90€ noite

Apartamento O Mourón:

  2 dormitorios dobres + 2 prazas en sofá cama no salón.

     4 persoas - 80€ noite

     5 persoas - 95€ noite

      6 persoas - 110€ noite

 

Información e reservas:

   Praia de Seselle Apartamentos turísticos

   praiaseselle@gmail.com

    613044589

Recordos de infancia

Esta sinxela mesa de madeira de piñeiro ten máis de 40 anos e está moi ligada aos recordos familiares. Foi un dos primeiros mobles que fixo meu pai. Feita coma mesa de cociña e sobre ela, ademais das comidas familiares, houbo tarefas escolares e outras moitas vivencias da familia. Agora, pintada de branco e colocada no porche, está disposta a ser testigo doutros momentos: conversas, ratos de lectura, xogos de mesa,... dos nosos hóspedes.

A Barrosa

O concello de Ares ten praias e calas tan fermosas que resulta imposible dicir cal nos gusta máis. A praia de A Barrosa é unha desas perlas que salpica a costa de Bezoucos e unha das máis escollidas coma exteriores de películas e series. Moi ben orientada, aberta ao Golfo Ártabro, con tempo solleiro ou con días de temporal, sempre é unha delicia achegarse ata ela! A poucos minutos en coche da casa.

Paseo fluvial no humidal de A Xunqueira

En pleno casco urbano de Ares, a poucos minutos da casa, está o paseo fluvial da Xunqueira. Este espazo natural, un dos tesouros do noso concello, é un paseo obrigado tanto pola riqueza botánica, como polas aves que podemos observar: parrulos, galiñas de río, lavancos, etc.

Agora que comeza a época de cría poderemos ver ás parrulas coas súas roladas de parruliños. Paseo moi recomendable se temos crianzas.

(Lamentablemente, despois dos días festivos, poderemos ver tamén moito lixo tirado no paseo ou mesmo na auga.)